英格蘭足總盃今晚舉行多場第3圈重賽，其中熱刺會喺主場再鬥英冠米杜士堡。熱刺主場踢英足盃專恰非英超球隊，南韓國腳孫興民更係「弱旅殺手」，就算今場冇哈利卡尼亦冇有怕，熱刺讓1.5/2球，照捧上盤。

熱刺射手哈利卡尼養傷長抖，據報球會有意向意甲拿玻里借用舊將洛蘭迪回巢做替補，不過「遠水不能救近火」，熱刺暫時仍要以現有人腳打天下，好彩熱刺近年喺主場踢英足盃特別醒神，對上6場全勝之餘，仲有5次淨勝2球或以上，當中孫興民個人攻入8球，包括攻破韋甘比、米禾爾及羅奇代爾等非英超球隊，今次隨時又成贏波英雄。

熱刺已經連續4場比賽未贏過，急需一場漂亮勝仗振奮軍心；由熱刺舊將活基治領軍嘅米堡上次主場都爆冷不成，以佢哋今季各項賽事13場作客2勝5和6負表現，今次想創奇迹更唔容易，熱刺讓1.5/2球捧上盤。