喺泰國舉行嘅U23亞洲盃，今晚有B組及C組分組賽開打，其中B組尾場日本U23硬撼沙特阿拉伯U23。日本主帥森保一為洗脫「二奶教頭」污名，今屆劍指冠軍，而且「藍武士」於近屆分組賽例必先發制人，半場主勝有計。

由於日本係今年東京奧運東道主，毋須喺U23亞洲盃爭入三甲以獲取奧運入場券，但主帥森保一過去兩年，先後帶隊出戰亞運、亞洲盃同東亞盃，竟然全部只得亞軍，為擺脫「二奶教頭」惡名，梗係想捧走U23亞洲盃，順便為今夏奧運造勢。其麾下嘅遠藤溪太、小川航基、相馬勇紀及田中碧等，都係早已部署好出戰奧運嘅班底，今次更加入赫斯前鋒、有「浪速美斯」之稱嘅食野亮太郎，對冠軍可謂志在必得。

相反，沙特阿拉伯U23連續2屆喺分組賽出局，而且大部分球員都喺國內搵食，其水準比唔上日職、韓職等聯賽，實力難以提升，令佢哋與「東亞雙雄」日本及南韓嘅實力愈拉愈遠。加上日本最擅搶開局，近2屆合共6場分組賽唔單止贏晒，其中5場均在上半場已取得領先優勢，踢法咁搶韁，半場主勝乃不二之選。

同時間亦有C組大戰，南韓U23火併中國U23。南韓U23雖未有召入兩大中場李康仁及白昇浩，但仍有鄭優營、嚴原上、金大元及鄭承原壓陣，近兩屆共6場分組賽取得4勝2和之餘，最終都殺入4強。中國亦有張玉寧、楊立瑜等擔大旗，但實力唔及「小太極虎」，加上近2屆分組賽僅得1勝，寧捧讓球主勝。

周五凌晨西班牙超級盃第2場4強大戰繼續喺沙特阿拉伯上演，巴塞隆拿火併馬德里體育會。巴塞今季走勢再三出現波動，今仗更有正選門將達史特根因傷倦勤，面對踢法硬朗嘅強敵馬體會，巴塞為保持攻守平衡，踢法或會有所收斂，雙方戰況隨時陷入膠着，寧願捧中位數2.5球入球細更明智。

雖然暫時高踞聯賽榜首，不過華爾維迪帶領嘅巴塞隆拿表現依然未能說服一眾看客，尤其如今巴塞中場控制能力已大不如前，老將布斯基斯逐漸退化之外，今季新加盟嘅法蘭基迪莊發揮只係一般，仲需要時間適應球隊打法。上仗巴塞喺同城打吡遭聯賽包尾球隊愛斯賓奴逼和一役，該名荷蘭中場兩黃一紅被逐，令巴塞埋下失分伏線，其後迪莊情緒一度失控，更畀主帥華爾維迪點名批評，必定令呢位小將信心大受打擊，隨時影響今場發揮。加上正選門將達史特根因傷未有隨隊出征，亦為後防留下隱患，為免出現進退失據嘅局面，巴塞踢法或會轉趨保守。

馬體會喺主帥施蒙尼領軍嘅8年間，已經被改造成防守極之嚴密嘅強隊，今季馬體會後防雖然有大變動，但雷蘭洛迪和菲臘比蒙達里奧兩位新加盟巴西守將表現冇令球迷失望，迅速撐起施蒙尼嘅防守體系，前熱刺右閘捷比亞嘅加盟更進一步加強防線實力。相比之下，馬體會進攻就顯得失色得多，前鋒艾華路莫拉達入球效率依舊飄忽，難對巴塞造成太大威脅，況且馬體會近5次同巴塞交手，總入球全開2球或以下，其中更有3次半場食白果，今次兩強交鋒預計唔慌多入波，中位數2.5球入球細值博。