今晚英超聖誕新年快車第3站頭場，爆發倫敦打吡，阿仙奴喺主場硬撼死敵車路士，焦點梗係落在兩軍少帥兼名宿阿迪達及林柏特身上。剛接手阿仙奴嘅阿迪達，複製曼城嘅中前場逼搶打法，變相穩住咗防線，車仔主帥林柏特近期改踢3421陣式，3中堅配上雙翼衞協防，明顯以穩行先，加上近年碰頭上半場常未分高下，半場和值得再追。

阿迪達與林柏特球員時代都係打中場，以睇通大局同冷靜見稱。其中啱啱接手阿仙奴嘅新帥阿迪達，近年喺曼城擔任助教跟哥迪奧拿學嘢，令佢堅重視「全民逼搶」，防守唔單止係後衞嘅責任，應該由中前場做起，呢點正係阿仙奴多年來搞唔掂防守不穩嘅主因。達哥上仗首度領軍對般尼茅夫，雖然排出慣常嘅4231陣式，但前線嘅奧巴美揚、拿卡錫迪、雷斯尼爾遜及懶到出汁嘅奧斯爾，每逢失去控球權即湧上前做反搶，有效阻止對手進攻，仲有覆蓋範圍大嘅防中盧卡斯托拉拿殿後，大大減輕防線壓力，就算最終打和1比1，達哥連稱滿意，加上中堅哥林張伯斯停賽期滿復出，進一步鞏固兵工廠防線。

另一邊廂，車路士早前5場聯賽4度敗陣，表現反覆，林伯隨即喺快車首站變陣3421主守陣式，用魯迪格、葛特蘇馬及湯姆利出任3中堅，連同兩翼衞瞻前顧後，令防線變得更穩，更以2比0擊敗由恩師摩連奴領軍嘅熱刺，可惜到第2站佢哋踢番主動搶攻，即以0比2輸畀修咸頓，吸取教訓後，今場造訪死敵唔敢輕舉妄動。翻查紀錄，阿仙奴同車路士近9次正面交鋒，各得2勝5和2負，當中有7次開出半場和，其中5次半場波膽為0比0，可見兩軍碰頭初段都穩陣為上，而達哥同林伯都深明倫敦打吡嘅重要性，大家都唔想輸波失威，半場和不妨追多鋪。

至於曼城周一凌晨就會主場迎戰錫菲聯。新升班嘅錫菲聯係聯賽作客「不敗之師」，戰力超乎預期，況且「藍月亮」今季衞冕路上已經幾度失分，令人懷疑出戰聯賽嘅鬥心，呢場想讓到球半/兩球實在大貪，捧番錫菲聯下盤更穩陣。

曼城不敵狼隊之後，已經畀踢少1場嘅榜首球隊利物浦拋離14分，就快連車尾燈都望唔到，爭標形勢極度唔樂觀，賽後哥迪奧拿自己都承認衞冕希望幻滅：「利物浦領先優勢咁大，現時我哋同李斯特城爭第2更實際。」「藍月亮」今季後防不穩已成公開秘密，上仗中堅奧達文迪失位情況令人咋舌，呢場首席門將艾達臣摩拉斯仲要坐波監缺陣，曼城防線隨時再失守。
 

除利物浦之外，錫菲聯係英超開季至今作客未輸過波嘅球隊，包括曾逼和車路士同熱刺兩支Big6勁旅，呢支英格蘭中部老牌球隊今季9場作客不敗合共只失7球，防守力驚人，領隊維達奉行嘅整體壓迫戰術，對鍾意控球嘅對手嚟講堪稱係惡夢，呢場對住勁敵曼城，隨時再有驚喜，一於吼實錫菲聯下盤。