今晚英超熱刺作客「金絲雀」諾域治，諾域治做慣英超升降機，於限米煮限飯下經常遇強即屈，何況近4次聯賽碰頭熱刺贏咗3次，為爭入前4唔會留手，客勝有計。
 

諾域治整體實力與英超列強差幾條街，攻不銳、守不穩，就算主場出擊唔見得有利，除咗季初爆大冷贏過曼城之外，其後6場主場賽事，只得1和5負。查實「金絲雀」今季9場主場全部都有失波，除咗首戰紐卡素失1球外，其餘8場每場至少失2粒，累積失咗22粒，主場失球數字係今季英超第2高球隊，猶如不設防，加上上仗護級大戰輸畀阿士東維拉，跌落包尾，打擊士氣。

熱刺踢法堅進取，上仗反勝白禮頓2比1，堅有主帥摩連奴點都唔認輸嘅影子，面對諾域治呢類以守代攻嘅球隊，更加容易控制大局。雙方近4次交手熱刺贏3次，雖然孫興民要繼續坐波監，但睇番嗰3場勝仗，有2場「老孫」都缺陣，另1場亦未有踢足全場，所以對今場影響不大，而且隊長哈利卡尼最近2次對賽都梅開二度，證明佢對「金絲雀」特別有計。依家熱刺只落後「4哥」車仔3分，為爭前4必定開行Trobo，遇弱更不容有失，客勝有買趁早。

英超聖誕快車好波停不了，周日凌晨般尼主場挑戰曼聯。「紅魔」呢頭有養傷多時嘅法國中場保羅普巴復出，嗰頭麥湯米尼又整親好大機會要長抖，加上曼聯遇上陣地戰經常老鼠拉龜，呢場造訪踢法保守嘅般尼，「紅魔」進攻隨時遇上阻滯，轉捧中位數2.5球入球細好過。

喺拆禮物日擁有80%勝出率嘅曼聯，上仗成功保持優良傳統，主場先落後之下以4比1反勝紐卡素，除有格連活特同拉舒福特各建一功，仲有安東尼馬迪爾梅開二度，成功「拆紐」拎3分，不過半場被換出嘅中場麥湯米尼，賽後證實傷及韌帶，見到呢位蘇格蘭中場離開球場時右膝被重重包紮兼要拎拐杖，睇怕呢場對般尼都唔使預佢。

無論如何，喺聖誕快車期首戰以0比2作客輸畀護級分子屈福特之後，曼聯能夠反彈，領隊蘇斯克查總算可以長舒一口氣，但一場勝仗依然不足以掩蓋「紅魔」狀態飄忽嘅事實。雖然近期有保羅普巴傷愈復出，可惜法國中場久疏戰陣，未必能改善曼聯面對陣地戰時進攻乏力嘅問題。

唔少英超中下游球隊，為應付聖誕快車期嘅密集賽程，都難免會對踢法作出調整，般尼亦都唔例外，佢哋上仗僅以0比1不敵啱啱換帥嘅愛華頓，計埋該仗，般尼近3場波2勝1負兼只失過1球，全部總入球開2球或以下，踢法明顯更趨保守。況且般尼過去6次坐鎮草皮球場面對曼聯全開2球或以下，呢場隨時再擺定鐵桶陣迎接「紅魔」來襲，中位數2.5球入球細值得再追。